公務員的一天

某天中午，政府總部Canteen ……

公務員A：「喂，成個禮拜唔見人，放大假呀？」

公務員B：「係呀！啱啱攞左OEA（編按：即公務員海外教育津貼，Oversea Education Allowance）送個大仔去英國讀high school，所以請左一個禮拜假陪個仔過去英國搞入學手續囉！」

公務員A：「點解唔索性請多兩個禮拜假去歐洲玩吓呀？」

公務員B：「我都想架，不過我老細今日開始放大假，我要留喺度act佢個位呀！不過等佢番嚟我都要放架，我儲埋成170日假，再唔放就爆假架喇！（編按：九七前入職的公務員一般每年有40.5日大假，最多可儲180日）」

公務員A：「哈，其實我地一年咁多日假，加埋公眾及法定假期，而家又行埋五天工作制，計吓計吓一年差唔多有三份一時間唔駛返工！」

公務員B：「所以我話煲呔真係醒囉，識得搞五天工作制，簡直係特區成立以來最大嘅德政，唔駛花費額外資源就贏哂我地啲公務員嘅掌聲！以前老懵董就唔識咁做喇！」

公務員A：「鬼咩，阿董成世都未打過工，點似得煲呔咁由低做起，會明白我地啲打工仔嘅心態架？」

公務員B：「係呢，咁你呢排有乜搞作呀？」

公務員A：「無呀，上個月財政年度埋單計數之前，我地個office為左要一次過駛曬未用完既錢、以防俾Treasury（編按：即庫務科，Treasury Branch）搵藉口減資源，所以夾硬買左幾十部彩色printer、數碼相機同PDA。o的貨過兩日就會送黎，但係office個貨倉又爆哂棚，而家仲頭痛緊唔知o的野可以放o係邊。」

公務員B：「嘩，乜你咁落後架，而家仲會搞埋呢o的年尾大採購，學下我個office啦，我地每個月都會睇住盤數，隔兩個月度就大手筆買一次野，咁就唔駛谷埋財政年度完結時，先黎頭痛唔知點樣駛錢。」

公務員A：「有道理，黎緊呢一年我都要學你先。咁你呢，呢輪又有搞緊乜呀？」

公務員B：「呢輪忙於籌備薪酬趨勢調查呀。」

公務員A：「係喎，聽講阿財爺已經一早係財政預算案度作出撥備，睇黎今年加人工都無走雞喇！」

公務員B：「緊係喇，玩程序我地公務員最叻架喇！問題係最後加幾多囉。」

公務員A：「之前幾年香港經濟差，我地俾人鬧足咁多年，資源就狂cut。而家經濟好番、庫房水浸，大把部門等住請人同開位，睇嚟我地都算苦盡甘來喇！」

公務員B：「讀書都有教喇，柏金遜定律，官僚機構生命力幾頑強至得架！」

公務員A：「話時話，canteen啲嘢好似越來越難食。」

公務員B：「聽日出糧，一於book定枱去庸記食燒鵝喇。」

公務員A：「好提議喎，咁聽日call你喇！」

公務員B：「好呀！」